Isinagawa ng BFAR – National Capital Region (NCR), katuwang ang BFAR Central Office, ang pagsasanay sa tamang pamamaraan ng pagdedebone at pag-smoke ng isda sa Bureau of Corrections (BUCOR), Muntinlupa City noong Hunyo 23–24, 2026.
Matagumpay na naisagawa ang 2-araw na pagsasanay para sa mga kawani at Persons Deprived of Liberty (PDLs) ng BUCOR Muntinlupa City. Layunin ng pagsasanay na mabigyan ang mga kalahok ng teknikal na kaalaman at aktuwal na karanasan sa wastong proseso at pamantayang pamamaraan ng pagde-debone at pag-i-smoke ng isda. Bukod dito, layunin din ng aktibidad na malinang ang praktikal na kasanayan ng mga PDL bilang bahagi ng paghahanda sa pagkakaroon ng oportunidad sa kabuhayan, pagpapaigting ng rehabilitasyon, at pagtataguyod ng pagiging produktibo at pagiging handa sa muling pakikibahagi sa komunidad.
Sa kanyang mensahe, binigyang-diin ni Dr. Mea F. Baldonado, OIC ng RFTFCD, ang kahalagahan at layunin ng pagsasanay lalo na para sa mga PDL bilang bahagi ng kanilang rehabilitasyon at paghahanda para sa kanilang pagbabalik sa labas ng kulungan.
Tampok sa pagsasanay ang aktuwal na demonstrasyon at hands-on activity sa tamang pagde-debone ng bangus bago ito isailalim sa proseso ng pag-i-smoke. Ipinakita ng mga kalahok ang kanilang interes, aktibong pakikilahok, at pagpapahalaga sa mga bagong kaalaman at kasanayang kanilang natutunan.
Nagsilbing mga tagapagsalita ang mga Technical Personnel mula sa Fisheries Post-harvest Technology Division ng BFAR Central Office na sina Ms. Hazel M. Aguilar, Ms. Glaiza R. Hernandez, at Mr. Manuel Shairo M. Conde. Tinalakay nila ang mga paksa tungkol sa Introduction to Sanitation Standard Operating Procedures (SSOP), Fish Processing, at wastong pamamaraan ng pagde-debone at pag-i-smoke ng isda. Ibinahagi rin ni Ms. Maria Criselda G. Belchez, RFTS Staff, ang mahahalagang kaalaman hinggil sa tamang packaging at labeling techniques upang matiyak ang kalidad at kaangkupan ng mga produktong isda.
Dumalo rin sa aktibidad ang mga opisyal ng BUCOR na sina CTSSUPT Noel M Marquez, DVM (Deputy Director, Directorate of Reformation/OIC, Agro), Mr Dalmacio L Caringal, MCDRM (Director, Directorate for Personnel Education and Training Services), CSINSP Jerry Seth K Martinez (Chief, Agriculture Production Section), at CSINSP Carlito O Santos (Deputy Chief, Agricultural Production). Ipinahayag naman ni Mr. Caringal ang kanilang pasasalamat sa BFAR sa patuloy na suporta sa kanilang tanggapan, lalo na sa pagsusulong ng mga programang naglalayong mapaunlad ang kakayahan ng kanilang mga kawani at higit sa lahat, ang mga PDL.
Patuloy ang BFAR – NCR sa pagsusulong ng mga programang nagbibigay ng kaalaman, kasanayan, at oportunidad upang makatulong sa pagpapaunlad ng kabuhayan at pagpapalakas ng kakayahan ng iba’t ibang sektor ng komunidad.
#BFARNCR#FishProcessing#FisheriesTraining#BangusDeboning#FishSmoking#LivelihoodSkills